‘‘நயினா ஒண்டிக்கு ஒண்டி வர்றீயா...’’ !

2006 சட்டசபைத் தேர்தலில் எதிரொலித்த முக்கியமான கோஷம் இது. அந்த தேர்தலில் வழக்கம் போல சென்னையில்தான் பிரச்சாரத்தை ஆரம்பித்தார் கருணாநிதி. சென்னை புரசைவாக்கம் தானா தெருவில் நடந்த அந்த பிரச்சார கூட்டத்தில்தான் ‘‘நயினா ஒண்டிக்கு ஒண்டி வர்றீயா?’’ என்று சீறினார் தயாநிதி மாறன்.

தேர்தல் நெருக்கம் வரையில் கோபாலபுரத்தில் இருந்துவிட்டு அதிரடியாக போயஸ் கார்டனுக்கு தாவி அதிர்ச்சி வைத்தியம் கொடுத்தார் வைகோ. ‘‘23 தொகுதிகள் கேட்டோம் தரவில்லை. அதனால் கூட்டணி மாறினோம்’’ என்று கூட்டணி தாவலுக்கு பொழிப்புரை கொடுத்தார் வைகோ. இதனால் தி.மு.க. தலைமை ஏக கொதிப்பில் இருந்தது. புரசைவாக்கம் பிரச்சார பொதுக் கூட்டத்திலும் எதிரொலித்தது. வைகோவின் பெயரை சொல்லாமலேயே ‘‘நாயைக் குளிப்பாட்டி நடு வீட்டில் வைத்துவிட்டார் தலைவர்’’ என்று சொல்லி சீறினார் தயாநிதி மாறன். அந்த மேடையில் இருந்த தா.பாண்டியன் ‘‘தயாநிதி மாறன் தடம்புரண்டு பேசக்கூடிய நிலைக்கு ஆளாக்கப்பட்டிருக்கிறார்’’ என்று சொல்லி ‘‘தற்போதைய அ.தி.மு.க. ஆட்சியின் அராஜகங்களை சொல்ல தயாநிதி மாறனை கதாநாயகனாகக் கொண்டு மனோகரா திரைப்படம் எடுத்தால் தி.மு.க. கூட்டணி பிரசாரமே செய்ய வேண்டாம்’’ என்றார். தா.பாண்டியன் அப்போது தி.மு.க. கூட்டணியில் இருந்தார்.

இதற்கு அந்த கூட்டத்திலேயே பதில் சொன்ன கருணாநிதி ‘‘மனோகரா திரைப்படம் எடுத்தால் வசந்தசேனைக்கு எங்கே போவது. தா. பாண்டியன் பேசியதை தயாநிதி மாறன், பாராட்டாக எடுத்துக் கொள்ளக் கூடாது. மத்திய அமைச்சராக இருப்பவர் இப்படி பேசக் கூடாது. கோபம் வராவிட்டால் அவரது இளமைக்கு அர்த்தம் இல்லை. வாலிபத் துடிப்பு புரிந்து கொள்ள முடிகிறது. ஆனால் பெரியார், அண்ணா பாசறையில் பயிற்சி பெற்றவர்கள் பொறுமையைக் கடைப்பிடிக்க வேண்டும்’’ என்றார்.