அ.தி.மு.க. கூட்டணியில். விஜயகாந்தின் தே.மு.தி.க. சேருமா? என்று கடந்த சில மாதங்களாக நிலவி வந்த செய்திக்கு இன்று முற்றுப்புள்ளி விழுந்திருக்கிறது. ஜெயலலிதாவின் பிறந்த நாளான பிப்ரவரி 24ம் தேதி அ.தி.மு.க. தலைமை அலுவலகத்திற்கு தே.மு.தி.க. நிர்வாகிகள் வந்து கூட்டணி உறுதி செய்தனர்.
தமிழ் நாடு சட்டமன்றப் பேரவை பொதுத் தேர்தலில், அனைத்திந்திய அண்ணா திராவிட முன்னேற்றக் கழகத்தின் தலைமையிலான கூட்டணியில் இடம் பெறும் வகையில், தேசிய முற்போக்கு திராவிடக் கழகம் அ.தி.மு.க. அலுவலகத்தில் பேச்சுவார்த்தையில் ஈடுபட்டது. அப்போது அ.தி.மு.க. சார்பில் சார்பில், தொகுதி பங்கீட்டுக் குழு உறுப்பினர்களான, பொருளாளர் ஓ. பன்னீர்செல்வம், தலைமை நிலையச் செயலாளர் கே.ஏ. செங்கோட்டையன், தேர்தல் பிரிவுச் செயலாளர் பொள்ளாச்சி ஜெயராமன், ஆகியோர் கலந்து கொண்டனர். தேசிய முற்போக்கு திராவிட கழகத்தின் சார்பில், அக்கட்சியின் அவைத் தலைவர் பண்ருட்டி எஸ். ராமச்சந்திரன், பொருளாளர் ஆர். சுந்தர்ராஜன், இளைஞர் அணிச் செயலாளரும் விஜயகாந்தின் மச்சானுமான எல்.கே. சுதீஷ் ஆகியோர் பங்கு பெற்றனர்.
பேச்சுவார்த்தை முடிந்த பிறகு பண்ருட்டி ராமசந்திரன் பேட்டி அளித்தார். அ.தி.மு.க.வுடன் இணைந்து தொகுதிகளை பங்கீட்டு தேர்தலை சந்திக்க முடிவு செய்திருக்கிறோம். அது தொடர்பான பேச்சுவார்த்தை சுமுகமாக நடந்திருக்கிறது. அடுத்தக்கட்ட பேச்சுவார்த்தை நடைபெறும்." என்றார்.
கேள்வி: கூட்டணி மந்திரி சபை பற்றி பேசினீர்களா?
பதில்: ஏற்கனவே அதை நாங்கள் தெளிவு படுத்தி விட்டோம். தி.மு.க. ஆட்சி விரட்டி அடிக்கப்பட வேண்டும் அது ஒன்றுதான் முதல் குறிக்கோள். மக்கள் விருப்பத்திற்கு இணங்க அ.தி.மு.க.வோடு கூட்டணி சேர்ந்திருக்கிறோம்.
கேள்வி: மக்களுடனும் தெய்வத்துடன் தான் கூட்டணி என்று விஜயகாந்த் சொல்லி வந்த நிலையில் அ.தி.மு.க.வோடு எப்படி கூட்டணி சேர்ந்தீர்கள்?
பதில்: தி.மு.க. ஆட்சி தொலைய வேண்டும் என்பது மக்களின் எதிர்பார்ப்பு. அந்த எதிர்ப்பார்ப்புக்கு வடிவம் கொடுக்கும் வகையில் எதிர்க்கட்சிகள் எல்லாம் ஒன்று சேர்ந்து தி.மு.க.வை வீழ்த்த முடிவு செய்தோம். தெய்வத்தின் ஆசியும் அதுதான்
Comments