காங்கிரஸ் - தி.மு.க. கூட்டணி உடைகிறது. இன்று முடிவு எடுப்போம்: கருணாநிதி அறிவிப்பு

சட்டசபைத் தேர்தலில் காங்கிரஸ் - தி.மு.க. கூட்டணி தொடர்ந்து இழுபறியில் இருந்து வருகிறது. காங்கிரஸ் தொகுதி பங்கீட்டு குழுவை சேர்ந்த வாசன், ப.சிதம்பரம், ஜெயந்தி நடராஜன், தங்கபாலு, ஜெயகுமார் ஆகியோர் தி.மு.க. தொகுதி பங்கீடு குழுவை சேர்ந்த ஸ்டாலின், பொன்முடி, ஆற்காட்டார், துரைமுருகன், டி.ஆர்.பாலு ஆகியோருடன் இரண்டு சுற்று பேச்சுவார்த்தை நடத்தினார்கள். ஆனாலும் முடிவு எட்டப்படவில்லை. காங்கிரஸ் ஆரம்பத்தில் 80 தொகுதிகள் வரை கேட்டது. கடைசியில் 65 தொகுதிகளுக்கு இறங்கி வந்தது. தி.மு.க.வோ. 54 தொகுதிகளுக்கு மேல் தர முடியாது என்று கையை விரித்தது. தொகுதி ஒதுக்கீடு தவிர ஆட்சியில் பங்கு, அமைச்சரைவையில் சரி பங்கு இடம், குறைந்தபட்ச செயல்திட்டம் என்று சில கோரிக்கைகளையும் காங்கிரஸ் வைத்தது.

இந்த நிலையில்தான் குலாம் நபி ஆசாத் சென்னை வந்து முதல்வர் கருணாநிதியை சந்தித்தார். ஆனாலும் முடிவு எட்டப்படவில்லை. கடைசியில் டெல்லியில் நடந்த பேச்சுவார்த்தையில் 65 தொகுதிகளுக்கு காங்கிரஸ் சம்மதம் தெரிவித்தது. இந்த நிலையில் இன்று (மார்ச் 4) இரவு 12 மணிக்கு திடிரென்று கருணாநிதி அறிக்கை ஒன்றை வெளியிட்டிருக்கிறார். அதில் 63 இடங்களை காங்கிரஸ் கேட்பது கொஞ்சமும் நியாயமில்லை. அப்படி கேட்பது சரிதானா? என்னென்ன தொகுதிகள் என்பதை காங்கிரஸ்தான் முடிவு செய்யும் என்பது சரிதானா? தி.மு.க. உயர்நிலை செயல்திட்ட குழு கூட்டத்தில் உரிய முடிவு எடுப்போம். என்று சொல்லி இருக்கிறார்.

இதனால் காங்கிரஸ் தி.மு.க. கூட்டணி உடையும் நிலை உருவாகி இருக்கிறது. மார்ச் 5ம் தேதி மாலை அறிவாலயத்தில் நடக்கும் தி.மு.க. உயர்மட்ட செயல்திட்ட குழு கூட்டத்தில் கூட்டணியை முறித்துக் கொள்வது பற்றி முடிவு எடுக்க தி.மு.க. தீர்மானித்திருக்கிறது. கூட்டணி முறிந்தால் மத்திய அரசில் இருந்து தி.மு.க. விலக நேரிடலாம். தி.மு.க. மத்திய அமைச்சர்கள் ராஜினாமா செய்யப் போவதாக செய்திகள் அடிபடுகின்றன. இதனால் தமிழகத்தில் தி.மு.க. அரசுக்கு கொடுத்து வந்த ஆதரவை காங்கிரஸ் வாபஸ் பெறலாம். அப்படி நடந்தால் தி.மு.க. அரசு கவிழ்ந்து கவர்னர் ஆட்சி அமலுக்கு வர வாய்ப்பு இருக்கிறது