பிரதீபா பிரசாரத்தில் கூட்டணி குழப்பங்கள்! நேரடி ரிப்போர்ட்..

 2007 ஜூலை 8 தேதியிட்ட ஜூனியர் விகடன் இதழில் எழுதிய கட்டுரை இது!

. பிரதீபா பிரசாரத்தில் கூட்டணி குழப்பங்கள்!

ஜனாதிபதி தேர்தலில் காங்கிரஸ் கூட்டணி சார்பில் போட்டியிடும் பிரதீபா பாட்டீல், தன் பிரசாரத்தைத் தமிழகத்தில் இருந்து தொடங்கியிருக்கிறார். பிரதீபா பாட்டீலை ஆதரித்து சென்னையில் தி.மு.க. கூட்டணி சார்பில் மகளிர் பேரணியும் நடந்து முடிந்திருக்கிறது. ஜூலை 1-ம் தேதி அண்ணா சாலை மன்றோ சிலையில் இருந்து சேப்பாக்கம் வரையில் நடந்த இந்தப் பிரமாண்ட பேரணிக்கு, மதியத்தில் இருந்தே பெண்கள் குவிய ஆரம்பித்துவிட்டனர். ஊர்வலத்தை பிரதீபா பாட்டீல் பார்வையிடுவதற்காக, சிம்சன் அருகே ஒரு ஸ்பெஷல் மேடை அமைத்திருந்தார்கள். ‘ராஷ்டிரபதி பவன்’ மாடலில் அந்த மேடையை அமைக்க ஐடியா கொடுத்தது கருணாநிதிதானாம். இந்த மேடையை முந்தின நாள் இரவு வந்து பார்வையிட்டார் கருணாநிதி. ராஷ்டிரபதி பவன் மாடலின் கோபுரத்தில் கருணாநிதிக்குப் பிடித்த மஞ்சள்(!) நிறத்தில் கொடி பறந்து கொண்டிருந்தது. சரியாக மாலை 4.50-க்குக் கருணாநிதியின் கார் மேடை அருகே வந்து நின்றது. உடனே இறங்காமல் சிறிது நேரம் காரிலேயே காத்திருந்தார் கருணாநிதி. அடுத்த சில வினாடிகளில் பிரதீபா பாட்டீலை மத்திய அமைச்சர் டி.ஆர் பாலு, ஜெயந்தி நடராஜன் ஆகியோர் அழைத்துவந்தனர். பிரதீபா பாட்டீல் வந்ததும் காரைவிட்டு இறங்கிய கருணாநிதி, அவரை வரவேற்று மேடைக்கு அழைத்து வந்தார். மேடையில் கருணாநிதிக்கும் பிரதீபாவுக்கும் மட்டுமே ஸீட் போட்டிருந்தார்கள். மேடைக்குப் பக்கத்தில் இருந்த சிறிய மேடையில் முன்வரிசையில் கூட்டணிக் கட்சித் தலைவர்கள் அமர வைக்கப்பட்டனர். பின்வரிசையில் ஸ்டாலின், கருணாநிதியின் மனைவி தயாளு அம்மாள், பிரதீபாவின் உறவினர்கள் ஆகியோர் அமர்ந்திருந்தனர். தமிழகத்தின் பல்வேறு மாவட்டங்களில் இருந்தும் ஏராளமான பெண்கள் வந்திருந்தார்கள். தி.மு.க., காங்கிரஸ், கம்யூனிஸ்ட்கள், விடுதலைச் சிறுத்தைகள் என்று கூட்டணிக் கட்சியைச் சேர்ந்த பெண்கள் எல்லோரும் பேரணியில் திரண்டு வந்திருந்தனர். ஆனால் பா.ம.க-வினர் பெரிய அளவில் கலந்து கொள்ளவில்லை.

‘தமிழகத்தில் தொழிற்கல்விக் கட்டணத்தைக் குறைக்காவிட்டால் எம்.பி., எம்.எல்.ஏ-க்களுடன் கோட்டை முன்பு போராட்டம் நடத்துவேன்’ என்று சில நாட்களுக்கு முன்புதான் ராமதாஸ் அதிரடியாக அறிவித்தார். உயர்கல்வித் துறை அமைச்சர் பொன்முடி, ‘மத்திய சுகாதாரத் துறையை எதிர்த்துப் போராடத் தயாரா?’ என்று பதிலடி கொடுத்தார். இருவரும் மாறிமாறி அறிக்கை யுத்தம் நடத்தினர். இதைத் தொடர்ந்துதான் ஊர்வலத்தில் பா.ம.க-வினர் கலந்துகொள்ளவில்லை என்ற பேச்சு அடிபட்டது. ஊர்வலத்தை அமைச்சர் பொன்முடி வர்ணனை செய்து கொண்டிருந்தார். அவர் அருகில் அமர்ந்து, சலனமே இல்லாமல் ஊர்வலத்தைப் பார்வையிட்டார் ராமதாஸ். ஊர்வலத்தில் புதிய எம்.பி-யான கனிமொழி, அவரது தாயார் ராசாத்தி

அம்மாள், விஜயா தாயன்பன், சற்குணபாண்டியன் ஆகியோர் வந்தார்கள். மேடை அருகே வந்ததும், அவர்கள் மேடைக்குப் பக்கத்தில் ஓரமாக நின்றுகொண்டார்கள். ராசாத்தி அம்மாள் மட்டும் மேடைக்குப் போனார். பிரதீபாவுக்கு சால்வை போட்டார். ராசாத்தியம்மாளை மேடைக்கு அருகில் கூட்டணிக் கட்சித் தலைவர்கள் அமர்ந்திருந்த சிறிய மேடைக்குப் போய் அமரச் சொன்னார்கள். ஆனால், கருணாநிதி, பிரதீபா ஆகியோர் அமர்ந்திருந்த மேடையிலேயே ஸீட் போடச் சொல்லி உட்கார்ந்துகொண்டார். ஊர்வலத்தில் வந்த பெண்கள் எல்லோரும் கனிமொழியைப் பார்த்து உற்சாகக் குரலெழுப்ப... அவரும் பதிலுக்குக் கையசைத்து மகிழ்ந்தார். எழுதிவைத்த உரையை

ப் படித்த பிரதீபா பாட்டீல், ‘‘குடியரசுத் தேர்தல் பிரசாரத்தை சென்னையிலிருந்து தொடங்குவதை நான் பெருமையாக நினைக்கிறேன். பெண்களின் அதிகார மேம்பாட்டுக்காகப் பல பொறுப்பு களில் பணியாற்றி இருக்கிறேன். ஜனாதிபதி பதவிக்கான பொறுப்புகளை நான் நன்கறிவேன்’’ என்றார். அடுத்துப் பேசிய கருணாநிதி, ‘‘பிரதீபா பேசும்போது ஊர்வலத்தில் கலந்துகொண்டவர்களுக்கு நன்றி சொன்னார். அந்த நன்றி வெறும் வார்த்தை அளவில் இல்லாமல், எதிர்காலத்தில் நாடாளுமன்றம் மற்றும் சட்டமன்றங்களில் மகளிருக்கு 33 சதவிகித இட ஒதுக்கீடு கிடைக்க உதவுவதாகவும் இருக்க வேண்டும்’’ என்றார். ஊர்வலம் முடிந்த பிறகு தாஜ் கொரமாண்டல் ஹோட்டலில் பிரதீபாவுக்கு விருந்து ஏற்பாடு செய்திருந்தார் கருணாநிதி. இங்கேயே பிரதீபா பிரசாரத்தைத்

•  

• 
  

•  

தொடங்குவதற்காக தி.மு.க. கூட்டணிக் கட்சி எம்.பி., எம்.எல்.ஏ-க்கள் அழைக்கப்பட்டிருந்தனர். விழா மேடையில் கருணாநிதி, பிரதீபா ஆகியோருடன் எல்.கணேசன், வரதராஜன், முஸ்லிம் லீக் எம்.பி-யான அகமது, கிருஷ்ணசாமி, வீரப்ப மொய்லி, ஜி.கே.வாசன் ஆகியோர் அமரவைக்கப்பட்டனர். ராமதாஸ் ஆப்சென்ட். ஊர்வலத்தில் கலந்துகொள்ளாத ஜி.கே.வாசன், விருந்தில் கலந்துகொண்டார். அவருடைய ஆதரவாளர்கள் நிறைய பேர் எம்.பி-க்களாகவும் எம்.எல்.ஏ-க்களாகவும் இருப்பதாலோ என்னவோ, கிருஷ்ணசாமியோடு அவரும் மேடையில் அமரவைக்கப்பட்டிருந்தார் என்று சிலர் பேசிக்கொண்டார்கள். டெயில் பீஸ்: மே 9, மதுரை சம்பவத்துக்கு பிறகு கருவாகி உருவான ‘கலைஞர் டி.வி’, ஆகஸ்ட் 15-ம்தேதி ஒளிபரப்பைத் துவக்கும் என்ற பேச்சிருக்க... ‘செப்டம்பர் 15 முதல்’ என்று அறிஞர் அண்ணா பிறந்தநாளை மனதில் கொண்டு அறிவிப்பு வெளியாகி இருக்கிறது. அந்த டி.வி-க்கான மாடர்ன் சூரியன் படம் கொண்ட லோகோவுடன் வந்திருந்த வேன் ஒன்று, பேரணி நிகழ்ச்சிகளை கனகாரியமாகப் பதிவு செய்து கொண்டிருந்தது. - எம்.பரக்கத் அலி படங்கள்: சு.குமரேசன்